كتب - هاني أنيس :
عدة نصائح صدرها قسم الدفع الإلكتروني بإدارة قوص التعليمية ، تزامنا وصرف مرتبات مارس الجارى حيث سيبدأ الصرف بدء من ٢٤ مارس ، هذا وتضمنت النصائح ٦ تنبيهات وقرارات إتخذتها وزارة المالية إحترازا من الاصابة بفيروس كورونا المستجد، بحسب هاشم الطواب مسؤول بوحدة الدفع الإلكتروني بإدارة قوص التعليمية.
وأشار الطواب إلي انه تبقي 4 أيام على بداية صرف المرتبات، ومع الظروف الحالية متوقع إن كل الناس هتسعى لصرف الراتب بمجرد نزوله لشراء احتياجات غذائية تحديدا، يا ريت نستغل الأيام الجايه في التوعية ببعض النقاط المهمة على أوسع نطاق ممكن:
1- البنك المركزي أصدر قرار إن أي عملية سحب من أي ماكينة هتكون بدون أي مصاريف أو عمولات، يعني مش لازم تصرف راتبك من البنك اللي انت تابع ليه، اصرف الراتب من أي ماكينة ومش هيتخصم منك حاجه، مش لازم الزحام على ماكينات البنك الأهلي مثلا واصرف من ماكينة أي بنك قطاع خاص فاضية
2- بقدر الإمكان بلاش استخدام الماكينات في الأماكن المغلقة زي الماكينات داخل فروع البنوك، منعا لتكدس الناس في أماكن مغلقه..استخدم أفضل الماكينات في الشارع
3- حافظ على المسافة بينك وبين اللي قبلك واللي بعدك في حالة وجود طابور إنها متقلش عن متر... مهما كان اللي واقف قبلك أو بعدك غير ملتزم بدا إطلب منه بحزم وبوضوح الابتعاد
4- بلاش ترش كحول أو كلور مباشرة على الماكينة لأن دا ممكن يبوظها، استخدم منديل مببل بالكلور أو وايبس وامسح بيه برفق على لوحة المفاتيح او الشاشة قبل الاستخدام وبعده كمان يا ريت
5- لو انت شاب وتقدر تنزل في أي وقت فبلاش الاصرار على سحب الراتب في أوقات الذروة واسحب في أوقات أكثر هدوءا في الليل المتأخر والصباح الباكر لإن في سيدات أو كبار سن مضطرين يسحبوا رواتبهم بمجرد خروجهم من أعمالهم لإن مش متاح بسهولة ينزلوا تاني خلال اليوم
6- بقدر الإمكان متسحبش كل الراتب كاش، وسيب جزء من راتبك تقدر تستخدمه في عمليات دفع أونلاين للفواتير مثلا وكمان عن طريق الفيزا في الصيدليات الكبرى والسوبر ماركت الكبرى والمطاعم وغيرها..الهدف تقليل المتداول من الاوراق النقدية بين الناس واللي بتعد من أكثر الوسائط في نقل أي عدوى عموما.
ليست هناك تعليقات:
إرسال تعليق